БОГОСЛУЖЕНИЕ БОГОСЛУЖЕБНЫЕ ПЕСНОПЕНИЯ СТАТЬИ ФОТО И ВИДЕО ЗАДАТЬ ВОПРОС ССЫЛКИ

Антифоны степенны
Антифон 1-й:
Хор:	Г л а с 1: Внегда скорбети ми, услыши моя болезни, Господи, Тебе зову. Пустынным непрестанное Божественное желание бывает, сущым вне суетнаго мира. Слава, и ныне: Святому Духу честь и слава, якоже Отцу подобает, купно же и Сыну: сего ради да поем Троице единодержавие! Г л а с 2 На небо очи пущаю моего сердца к Тебе, Спасе, спаси мя Твоим осиянием. Помилуй нас, согрешающих Тебе много, на всякий час, о Христе мой, и даждь образ прежде конца покаятися Тебе! Слава, и ныне: Святому Духу, еже царствовати подобает, освящати, подвизати тварь: Бог бо есть, единосущен Отцу и Слову. Г л а с 3 Плен Сионь Ты изъял еси от Вавилона и мене от страстей к животу привлецы, Слове! В юг сеющий слезами божественными, жнут класы радостию присноживотия. Слава, и ныне: Святому Духу всякое благодарение, якоже Отцу и Сыну сооблистает. в Нем же вся живут и движутся. Г л а с 4 От юности моея мнози борют мя страсти, но Сам мя заступи и спаси, Спасе мой! Ненавидящий Сиона посрамитеся от Господа: яко трава бо огнем будете изсохше! Слава, и ныне: Святым Духом всяка душа живится и чистотою возвышается, светлеется Тройческим единством священнотайне. Г л а с 5 Внегда скорбети мне, Давидски пою Тебе, Спасе мой: избави душу мою от языка льстиваго. Пустынным живот блажен есть: Божественным рачением воскриляющымся. Слава, и ныне: Святым Духом сдержатся вся, видимая же с невидимыми: самодержавен бо сый Троицы Един есть неложно. Г л а с 6 На небо очи мои возвожу, к Тебе, Слове: ущедри мя, да живу Тебе! Помилуй нас, уничиженных, устрояя благопотребныя Твоя сосуды, Слове! Слава, и ныне: Святому Духу, всякая всеспасительная вина, аще коему сей по достоянию дхнет, скоро вземлет от земных, воспаряет, возращает, устрояет горе. Г л а с 7 Плен Сионь от лести обратив, и мене. Спасе, оживи, изъимая работныя страсти! В юг сеяй скорби постныя со слезами, сей радостныя пожнет рукояти присноживопитания. Слава, и ныне: Святым Духом источник Божественных сокровищ, от Него же премудрость, разум, страх, Тому хвала и слава, честь и держава! Г л а с 8 От юности моея враг мя искушает, сластьми палит мя, аз же надеяся на Тя, Господи, побеждаю сего. Ненавидящий Сиона да будут убо прежде исторжения яко трава: ссечет бо Христос выя их усечением мук. Слава, и ныне: Святым Духом, еже жити всяческим: Свет от Света Бог велик: со Отцем поем Ему и с Словом!
Антифон 2-й:
Хор:	Г л а с 1 На горы Твоих вознесл еси мя законов, добродетельми просвети, Боже, да пою Тя. Десною Твоею рукою приим Ты, Слове, сохрани мя, соблюди, да не огнь мене опалит греховный! Слава, и ныне: Святым Духом всяка тварь обновляется, паки текущи на первое: равномощен бо есть Отцу и Слову. Г л а с 2 Аще не Господь бы был в нас, кто доволен цел сохранен быта от врага, купно и человекоубийцы? Зубом их не предаждь, Спасе, Твоего раба, ибо львовым образом подвизаются на мя врази мои! Слава, и ныне: Святому Духу живоначалие и честь; вся бо созданная яко Бог сый укрепляет силою, соблюдает, во Отце Сыном же! Г л а с 3 Аще не Господь созиждет дом добродетелей, всуе труждаемся: душу же покрывающу, никтоже наш разорит град. Плода чревна Духом сынотвореное Тебе, Христу, якоже и Отцу, святии всегда суть! Слава, и ныне: Святым Духом прозрится всякая святыня, премудрость; осуществует бо всякую тварь: Тому послужим: Бог бо, яко Отцу же и Слову! Г л а с 4 Воззвах Тебе, Господи, тепле, из глубины души моея, и мне да будут на послушание Божественная Твоя ушеса! На Господа надежду всяк, кто стяжав, вышший есть всех скорбящих. Слава, и ныне: Святым Духом точатся благодатные струи, напаяюща всяку тварь ко оживлению! Г л а с 5 На горы, душе, воздвигнемся, гряди тамо, отнюдуже помощь идет. Десная Твоя рука и мене, Христе, касающися, от лести всякия да сохранит! Слава, и ныне: Святому Духу благословяще рцем: Ты еси Бог, живот, рачение, свет, ум: Ты благостыня, Ты царствуеши во веки. Г л а с 6 Аще не Господь бы был в нас, никтоже от нас противу возмогл бы вражиим бранем одолети: побеждающий бо от зде возносятся. Зубы их да не ята будет душа моя, яко птенец. Слове: увы мне, како имам от врага избыта, грехолюбив сый! Слава: Святым Духом обожение всем, благоволение, разум, мир и благословение: равнодетельный бо есть Отцу и Слову. И ныне, тойже. Г л а с 7 Аще не Господь созиждет дом душевный; всуе труждаемся: разве бо Того ни деяния, ни слово совершается! Плода чревна, святии духодвижно прозябают отеческая предания, сыноположения. Слава, и ныне: Святым Духом всяческая еже быти имут: прежде бо всех Бог, всех господьство, свет неприступен, живот всех! Г л а с 8 Сердце мое страхом Твоим да покрыется смиренномудрствующее: да не вознесшееся отпадет от Тебе, Всещедре! На Господа имевый надежду, не устрашится тогда, егда огнем вся судити имать, и мукою. Слава, и ныне: Святым Духом, всяк кто Божественный видит, и предглаголет, чудодействует вышняя, в Триех Единаго Бога поя: аще бо и трисияет, единоначальствует Божество!
Антифон 3-й:
	Г л а с 1 О рекших мне: "Внидем во дворы Господни", возвеселися мой дух, срадуется сердце! В доме Давидове страх велик: тамо бо престолом поставленным, судятся вся племена земная и языцы. Слава и ныне: Святому Духу честь, поклонение, славу и державу, якоже Отцу достоит, и Сынови подобает приносити: Единица бо есть Троица естеством, но не лицы. Г л а с 2 Надеющийся на Господа уподобишася горе святей, иже никакоже движутся прилоги вражиими. В беззаконии рук своих да не прострут Божественно живущий: не оставляет бо Христос жезла на жребии Своем. Слава, и ныне: Святым Духом точится всяка премудрость: отсюду - благодать апостолом, и страдальчествы венчаются мученицы, и пророцы зрят! Г л а с 3 Боящийся Господа блажени, в пути ходяще заповедей: снедят бо животное всеплодие, - Окрест трапезы Твоея возвеселися зря Твоя, Пастыреначальниче, исчадия, носяща ветви благоделания! Слава, и ныне: Святым Духом всякое богатство славы, от Него же благодать и живот всякой твари, со Отцем бо воспеваемь есть и с Словом! Г л а с 4 Сердце мое к Тебе, Слове, да возвысится, и да ничтоже усладит мя от мирских красот на слабость. К матери своей якоже имать кто любовь, ко Господу тепльше люблением должни есмы! Слава, и ныне: Святым Духом боговедения богатство зрения и премудрости: вся бо в Сем Отеческая веления Слово открывает! Г л а с 5 О рекших мне, во дворы внидем Господня: радости многия исполнен быв: молитвы возсылаю! В дому Давидове страшная совершаются: огнь бо тамо паля всяк срамный ум! Слава, и ныне: Святому Духу живоначальное достоинство, от Негоже всякое животно одушевляется яко во Отце, купно же и Слове. Г л а с 6 Надеющийся на Господа, врагом страшни, и всем дивни, горе бо зрят. В беззакония рук своих, праведных жребий, помощника Тя имея, Спасе, не простирает. Слава: Святаго Духа держава на всех: Емуже вышняя воинства покланяются со всяким дыханием дольным. И ныне, тойже. Г л а с 7 Боящийся Господа, пути живота обретше, ныне и присно ублажаются славою нетленною. Окрест трапезы твоея, яко стеблие, видя исчадия твоя, радуйся и веселися, приводя сия Христови, пастыреначальнику. Слава, и ныне: Святым Духом глубина дарований, богатство славы, судеб глубина велия, единославен Отцу, и Сыну, служимь бо. Г л а с 8 Воззвах Тебе, Господи, вонми, приклони ми ухо Твое вопиющу, и очисти, прежде, даже не возмеши мене отсюду! К матери своей земли отходяй всяк, паки разрешается прияти муки, или почести поживших! Слава, и ныне: Святым Духом богословие, Единица Трисвятая: Отец бо безначален, от Него же родися Сын бездетно, и Дух со-престолен, сообразен, от Отца просиявший!
Антифон 4-й:
Хор:	Г л а с 8 Се ныне что добро, или что красно, но еже жити братии вкупе: в сем бо Господь обеща живот вечный! О ризе своей, Иже крины сельныя украшаяй, повелевает, яко не подобает пещися! Слава, и ныне: Святым Духом, единовидною виною, вся содержатся мироподательне: Бог бо Сей есть, Отцу же и Сынови единосущен господственне!